Bura haradı? Weeeebziiiiiiinee!..
Hə, düz deyirsiz, bloq sistemindəyik. Onunla da razıyam - çox vaxt hərdən bizə bloq da deyirlər. Xəbərnamə kimi bloqlar sisteminə də qoşulmuşuq, etiraf edirəm. Hər yazarımızın bundan başqa 25134568783142309 dənə bloqu da var. Amma bu o demək deyil ki, oxuduğunuz/izlədiyiniz/sevdiyiniz/sevmədiyniz/nifrət elədiyiniz, sırf yazarlarıyla tanışlığınız var deyə, xalada xətir qalmasın deyə, iki gündən bir açıb baxdığınız, kefiniz kök olanda hərdən bir “bomba yazıdı!” şərhi yazdığınız bu sayt bloqdu. Ay qardaş, ay dayı, ay nənə, ay baba! Bu bloq deyil! Webzine`dir!
Blog: Blog, əlavə texniki məlumat olmadan, öz istədiyi şeyləri, öz istədiyi şəkildə yazan istifadəçilərin yaratdığı, gündəliyə bənzər web saytıdır. İngilis dilindəki “web“ və “log” sözlərinin birləşməsindən alınan “weblog“ sözlüyünün zamanla təhrif olunmuş formasıdır.
Webzine: ingiliscə “web” və “magazine” sözlərinin birləşməsindən əmələ gəlib. Online dərgi deməkdir. Müəyyən vaxtaşırı yenilənən, dövri e-mətbu orqandır. Bəzən e-zine də deyirlər. Fanzine (“Fan” və “magazine”) kimi əlavələri də mövcuddur. Fanzine daha çox konkret bir əhatə dairsəni əhatə edir və fanatların e-dərgisi qismində çıxış edir.
Bu sayt bir nəfərin memuarları, gündə yaşadığı hadisələr, yazılar toplusu, gündəliyi olmadığına görə, əsas da konkret bir nəfər tərəfindən idarə olmadığına/yazılmadığına görə bloq deyil.
Birdən KQB-dən gəlib “Kimsiz? Nəçisiz? Nə işlə məğul olusuz? Burda niyə yığışmısız?!” deyən olsa, ilk cavabımız “no politic, no problem” olacaq. Ki, onsuzda underground həyat tərzindən bəhs edirik biz. Məqsəd nəsə yaratmaq deyil, yaranmaqda olana təkan verməkdi.
Alternativ yaratmaq.
Alternativ ədəbiyyat,
Alternativ musiqi,
Alternativ mədəniyyət,
Alternativ cəmiyyət və bütün bunlar üçün alternativ media…
Biz beyinləri qırışdırmaq istəyirik. İstəyirik küçədə əcaib-qəraib paltarlar geyib özünü kiməsə oxşatmağa çalışan gəncliyimiz əsl undeground`luğu anlasın. Beyninin qırışlarını artırsın. Bir az düşünsün. Sadəcə divara “rock” yazıb, saçını uzatmasın. Enli şalvar geyib, üzərində “50Cent” yazılmış köynəklərə pul tökməklə underground həyatın əslində nəyə qarşı olduğundan xəbərsiz qalmasın. İstəyirik fərqlənmək xətrinə fərqlənməsin. İstəyirik avara damğası almasın. İstəyirik “rock” deyəndə qara geyimli dilənçiyəbənzərlər, “rap” deyəndə cibgir və oğrular ağla gəlməsin. Skeyterlərə, brek-danserlərə, hip-hopçulara, ekstrimçilərə, qraffiti yaradanlara xuliqan və küçə uşağı kimi baxmasınlar. Biz daha güclü profil, daha güclü etiraz dalğası yaradılmasına ümid edirik.
Çağdaş dövrün bütün yeniliklərinə qarşıyıq.
Biz TV kanallarına, reklamlara, müğənnilərə, şairlərə, ziyalılara, şirkətlərə, aristokratlara, tarixə, mədəniyyətlərə, xalqlara, insanlığa, gəlmişə, keçmişə, hər şeyə qarşıyıq. Bu dünyada çirkə bulaşmış hər şeyə…
Amma bizim qarşı olmağımız anarxist, ya da sol-inqilabçı etirazı deyil. Bu undeground həyatın qarşı duruşudur. Upground`un yaratdığı zərurətlərdir…
Nəysə. Fəlsəfə bu qədər. Keçək indi saytla bağlı bəzi məsələlərə.
Elə bilirsiz ilinə 10 dollar ödəyib host və 30 dollar ödəyib domeyn adı almaq bizim üçün problemdir? Yox əşşi, o qədər də kasıb deyilik. Sadəcə “Amateur Spirit”i (həvəskar ruh) yaşatmaq üçün Blogsome`a sığınmışıq.
Bu məqamda onu da deyim ki, artıq boyundur olmaqdan bezmişik bəlkə yaxında alternativa.net domeyninə köçə bildik =) … Ya qismət!
Bu saytda reklam olmayacaq. Google`ın 2-3 dollarına qalmamışıq =).
Bu sayta heç kim sponsorluq da edə bilməz. Çünki pulları çatmaz =).
Bu saytı reklam eləyənlərə “çox sağol”dan başqa heç nə verəsi deyilik. Naşükür olmayın, yoxsa onu da demərik =)
Onu da qulağınızdan sırğa edin ki, anti-əyləncə saytı olaraq 18+ söhbətlərinə girəsi deyilik. Ucuz reytinq düşkünlərinə oxşamırıq ki? Onda bizə top-listlərə girmək də lazım deyil. Heç yüzlərlə şərh yazmağınıza da gərək yoxdu. Əsas odur ki, bizi başa düşəsiz. Razılaşsaz da olar, razılaşmasaz da.
Özləri üçün yazıb, bir şeylər yaratmağa çalışanlara oxşayırıq. Bizi öz eqoları xətrinə sayt quranlara da oxşada bilərsiz, kimlərinsə eqosunu oxşamaq üçün əldən-ayaqdan gedənlərə də..
Bu da belə.
Vebzini idarə edənlərə gəlincə.
Bütün texniki və tərtbat işləri az-ya adlı dinsiz, imansız, Allahsız, diktator ruhlu, komunistlərdən fərqlənməyən faşistə aiddir =)
Dərgimizin rektoru.. yox, reduktoru.. eee, redaktoru Usta`dır 
Təqdimat və efirə hazırlama da ona məxsusdur. O qədər rüşvət hörmət istəyir ki, bu bölmələrin yenilənməsi xeyli vaxt çəkir =)
Xarici informasiyalar toplusunu bizə çatdıran, bütün rokerlərdən dəqiq məlumat verən ever the same`dir. İşləri çox gec görür. Amma o qədər keyfiyyətli görür ki, adam heç nə deyə bilmir 
İndiyə qədər yazıları və əsərləri dərc olunanlar: Back to Black, Qaraqan, Felon de Jure, PRoMete, ErranT, Vüqar Baba, BaltazArt, İbrahim Keleş, Dejon, Thienbao, ever the same, az-ya, Usta və s. və i. (hamısı yadımda qalmayıb =))
Dərgimiz dosta tanışa “filan şeyi görmüsən?” demək yoluyla yayılır. Abunəlik üçün Lazımsız Şeylərə müraciət edə bilərsiz. Gəl bəriylə qeydiyyatdan keçib şərh filan da yazmaq imkanınız var. Özünüzü yaxşı aparsaz, yazarlıq hüququ da qazana bilərsiz =)
Vəssalam.
|
vaxt: 10:05 am (UTC+8) gör nə deyiblər (2)
