:: alternativ`a

az-ya 

 Mən hamıdan gec öləcəm-

Saatların əqrəbləri təmbəlləşir gündən-günə.

Zaman yoxmu, zaman varmı?

Ilk baharmı, son baharmı?

Ötürdüyüm hər bir ildən xatirələr yadigarmı?

Gizlimi, ya aşikarmı qocalıram gündən-günə,

Inan, aşağı endikcə ucalıram gündən günə.

Sarmaşıqlar sarılıbdır əllərimə qoymur yazam,

Yaddaşıma lənət olsun bu şəhərdə qoymur azam.

Bədən ölər, ruh yaşayar, məhəbbəti ruh daşıyar,

Nə edim ki, bədəndən tez ruhum ölür gündən-günə,

Bu zülmətdə bir şam ilə o da sönür gündən-günə.

Milyonların arasında tənhalığa qapılmışam,

Nə deyərəm, nə gülərəm, sanki daşdan yapılmışam,

Cırılmış bir paltar kimi bədənimdən atılmışam,

Ciyərlərim vermir nəfəs paxıllaşır gündən-günə,

Güzgüdəki düşmənlərim yaxınlaşır gündən-günə.

Ağıllı anlamaz məni dəlilərin şairiyəm,

Ağıllı anlamaz məni dəlilərin şairiyəm,

Dənizlərdə batım gedən gəmilərin şairiyəm,

Qığılcımla alovlanan zəmilərin şairiyəm.

Alovlanan zəmilərim külə dönür gündən-günə,

Yaxınlarım məzarlıqda gülə dönür gündən günə.

Gəncəm, amma qəlbim deyir:

-Qoca, yüzü vurdun başa

Ürəyin hər döyüntüsü deyir yaşa,yaşa,yaşa!

Nə yaşamaq? Yaşadıqca yaşananlar dəydi daşa.

Yazı qışı aşa-aşa yaşayıram gündən-günə,

Daşıyıram yaraları qaşıyıram gündən-günə,

Ağacların yarpaqları, bax, tökülür gündən-günə,

Qurduğum arzulara bax, bax, sökülür gündən-günə,

Belim düzdü qəlbim isə bax, bükülür gündən-günə.

Amma yuxularım deyir, mən hamıdan gec öləcəm

Mən ya dahi bir sənətkar, ya da ki, bir heç olacam.

Qaraqan

Açığı adını eşidəndə məni o qədər də cəlb etməmişdi. Rüfət`in təkidindən sonra, hətta deyərdim ki, zorla məni PC`nin arxasına oturdub, DVD`ni qoyaraq izlətdirəndən sonra baxmağa dəydiyini başa düşdüm. Rus-Çeçen müharibəsi, Rusyadakı milli azlıqların problemləri, Sovet dövründən qalan "çürüntülər"in müasir rus cəmiyyətinə təsiri və s. Bunları uzatmaqda olar..
Mükəmməl kamera çəkilişi və əla spesifikalarla zəngin psixoloji drama.
İzləməyə dəyər.

[az-ya] 

Gözəl işlər. Baxın, gözləriniz sevinsin, zövqünüz zənginləşsin

 Müəllif

Gecə saat 1. Gənclik. Bina qarşısında basketbol meydançasında futbol. Narazı qonşu. Atatürk parkında futbola davam. Qaranlıqda vurulan qollar. "Türkiyə-Almaniya". 15-11. Qələbə. Gecə saat 2. Yorğunluq yoxdu. Ağrıyan ayaqlar və məmnuniyyət hissi var. Nəhayət ki, nəsə fərqli bir şey oldu. Kaş ki, belə kiçik yeniliklər, parıltılar bol olaydı. Bozarıram yavaş-yavaş. Bozarırıq. Gecə saat 3. Azərbaycan və Türkiyə cəmiyyəti arasındakı fərqlərin müzakirəsi. Dəli olmaq olar bu ölkədə. Səhər saat 8. Oyanış. Metro. 2 Xaçapuri və çay. İnternet. Vebzin. Post.

[Usta] 

Rədd olun başımızdan, Ürəyimizdən, Həyatımızdan. Yalanlarınızı, doğrularınızı, Cavablarınızı, sorğularınızı, Nöqtələrinizi, vurğularınızı da götürün gedin. Tək buraxın məni. Tək buraxın bizi. Aparın özünüzlə reklamlarınızı da, Rəngsiz sloqanlarınızı da, Dadsız Mcdonalds-larınızı da, Pepsi, Kolalarınızı da, Superqəhrəmanlarınızı da - Lazım deyil onlar heç kəsə. Dağılmaz dünya əgər oxumasa rəqsanəniz, Göbək atmasa, sellülit oynatmasa rəqqasəniz. Gedin, soxulun adalarınıza, Alın özünüzkimiləri də aralarınıza. Pıçıldaşın, hırıldaşın, quduzlaşın, Amma gedin. Gedin, başımızdan. [Usta]